![]("//site-t7p6yx4x.wsecdn1.websitecdn.com/uploads/o/d3b54ea785fb479ab9507ca60c08b2e1.jpeg?v=242609060956")
ევროპის აკადემიის თბილისის რეგიონულ ცენტრს მიმდინარე წლის ოქტომბერში ეწვია ევროპის აკადემიის წევრი, ჯეჯანის ჩინური მედიცინის უნივერსიტეტის ტრანსლიაციური ნეირომეცნიერების საერთაშორისო კვლევითი ინსტიტუტის დირექტორი, პროფ. ვლადიმირ პარპურა.
საქართველოში, ასევე, იმყოფებოდა ევროპის აკადემიის წევრი და ამავე აკადემიის თბილისის რეგიონული ცენტრის სამეცნიერო საბჭოს თავმჯდომარე, ლუნდის უნივერსიტეტის (შვედეთი) პროფესორი ზაალ კოკაია.
თბილისის რეგიონულმა ცენტრმა ილიას სახელმწიფო უნივერსიტეტთან და ივანე ბერიტაშვილის ექსპერიმენტული ბიომედიცინის ცენტრთან თანამშრომლობით ორგანიზება გაუწია ნეირომეცნიერებისადმი მიძღვნილი ლექციების სერიას. აღნიშნული ციკლის კოორდინატორი ილიას სახელმწიფო უნივერსიტეტის ქიმიური ბიოლოგიის ინსტიტუტის დირექტორი და ივანე ბერიტაშვილის ექსპერიმენტული ბიომედიცინის ცენტრის სამეცნიერო საბჭოს თავმჯდომარე; ამავე ცენტრის ნეიროფარმაკოლოგიის ლაბორატორიის ხელმძღვანელი, პროფ. რევაზ სოლომონია გახლდათ.
8 ოქტომბერს ილიას სახელმწიფო უნივერსიტეტში პროფ. პარპურამ წაიკითხა ლექცია: “ასტროციტების მიერ გლუტამატის რეგულირებადი გამოყოფა ჯანმრთელობის და დაავადებების დროს”. მან წარმოადგინა მტკიცებულებები, იმის შესახებ, რომ გლიური უჯრედების ქვეტიპს – ასტროციტებს შეუძლიათ გლუტამატის ეგზოციტური გამოყოფა და იმსჯელა იმაზე თუ როგორ ხდება ამ გამოყოფის რეგულირება. მან ასევე განიხილა ვეზიკულური შერწყმის დრო-სივრცითი მახასიათებლები, რომელიც არის ასტროციტების მიერ გლუტამატის გამოყოფის თანმხლები პროცესი. შეჯამების სახით კი წარმოადგინა ტრანსლიაციური პროექტი, რომელიც მიზნად ისახავს ასტროციტომა IV-ის, ტვინის მომაკვდინებელი სიმსივნის სამკურნალოდ ახალი მეთოდების დანერგვას.
პროფ. პარპურას ლექცია ფოკუსირებული იყო ნახშირბადის ნანომილაკებზე (CNTs), რომლებიც იმედისმომცემი პროგნოზების გაკეთების საშუალებას იძლევიან ნეირობიოლოგიასა და ბიომედიცინაში. სტრუქტურული სტაბილურობა და მარტივი ქიმიური მოდიფიკაცია მათ ბიოსამედიცინო მიზნებით გამოყენებისთვის მოსახერხებელს ხდის. პროფ. პარპურამ განიხილა ქიმიურად ფუნქციური, კოლოიდურ ხსნარებად ან შრეებად გამოყენებული CNT-ების ეფექტები ასტროციტების მორფოლოგიურ და ფუნქციურ თვისებებზე (გლუტამატის ათვისება და ვეზიკულური გადამუშავება), CNT-ების პოტენციური გამოყენების გათვალისწინებით ნეირო პროთეზირებაში, ასტროციტომა/გლიობლასტომას პრეკლინიკურ მკურნალობასა და ტრავმებით დაზიანებული ტვინის მკურნალობაში.
ახალი ოლიგოდენდროციტების მიღება ღეროვანი უჯრედების გამოყენებით მნიშვნელოვან იმედებს იძლევა თერაპიული ჩარევის თვალსაზრისით. რემიელინიზაციის ხელშეწყობით, ეს თერაპია შესაძლოა გახდეს დაკარგული ფუნქციების აღდგენისა და უკეთესი ფუნქციური აღდგენის საშუალება, როგორც ინსულტიანი, ისე გაფანტული სკლეროზის მქონე პაციენტებისთვის.
